Ka’p ëy pën tnïjäwï sutsoo jïte’n atëm ja nteety’amëj ja ntääk’amëj ja xëëw ijty tmatsyowtë tpayë’ëtyë. Nïjäwïts ku jaa ja jää’ytë pën ja’pë wïnmää’ny jyäjttëp jïts tyïktuu’yë’ëtyë. Jotmëny atëm njïp’ijxyïn ku nay jate’n ja xëëw yyïkmatsyëy sää n’ijxyï’an ja xëëpayë’ëpyë miti’ yäm nïtuki’iyï nyïktuu’nyïntëp; ka’ts jïte’n jyate’nï.
Yää yïnet x’ejxt sutsoo ja xëëw, ja po’ jïts ja jumëjt y’apëjkmukyïtë, tiijaty yïkxëëtejtï jïts sutsoo nayïte’n yïknïjäwï sää ja mutsk jyää’y’aty pïnë tii xëëw uk tii po’ kyaxi’iky, uk sutsoo yïknïjäwï juunï ëy nnejpïnt ja ääy ja ujts.
Ja xëëmaapyë xëëmatsyoopë ixaa ja y’ääw y’ayuujk pyïktäktëp, jïts tnïkäjpxtë tnïmatyä’äktë ja nyïjää’wïn, ja wyejïn kyajïn.
Ja nmïku’uk Lilia Heber Pérez Díaz jïts ja Victorino Vásquez Martínez yä’ät yë tyunk pëjkk. Uk’ejxts mejts jïts jate’n amukï njaakyïkmëjtääjkïntët ja ntääk’amëj nteety’amëj ja wyïnmää’ny. Tuk’ejx jë mmïku’uk uk tukmatow jïts t’ejxt.